قام الناشط البيئي بول أبي راشد بالرد على كلام النائب جبران باسيل بعد ان طالب الأخير الى محاكمة من أوقف مشروع سدّ بسري مدّعياً بكذبة البيئة.
ونشر أبي راشد الرد على صفحته على مواقع التواصل، وجاء ما يلي:
الرد على خطاب جبران باسيل بجزين بتاريخ ١ أيار ٢٠٢٢
١٠ أضاليل وحقيقة وحدة عن سد بسري
ردي على جبران باسيل مش من منطلق سياسي، انا مش مرشح هالسنة عالانتخابات النيابية ٢٠٢٢ .
رفضت الترشح لسببين : الأول لانني برفض إجراء انتخابات قبل محاسبة المسؤولين اللي وصلوا البلد للإفلاس والدمار ومنعن من الترشح ، والثاني هو إجراء الانتخابات على نفس القانون المعمول على قياس مرشحي المنظومة اللي افلست البلد ودمرته
بس ما بيجوز نسكت عن التضليل الفاضح من قبل السيد باسيل عن مشروع سد بسري
بنصحكن تحضروا الفيديو المرفق وتركزوا معي على ١٠ اضاليل وحقيقة وحدة :
١- أنجزنا كثير :
انا مش رح احكي عن ملفات الكهربا وغيرها، رح اذكر اخفاقات وزارة الطاقة والمياه اللي صرلها حوالي ١٤ سنة بإدارة فريق السيد باسيل السياسي واللي فشلوا بتشغيل محطات التكرير وصيانة الشبكة المهترئة وتنظيم عشوائية الآبار الجوفية ودمروا أجمل وديان لبنان بسدود عشوائية هدرت المال العام وشوهت الطبيعة ودمرت الأراضي الزراعية بوادي نهر ابراهيم ووادي نهر الجوز ووادي بقعاتة كنعان وبلعا وسهل المغيثة ومرج بسري
٢- روحت عليكم ١٧ تشرين سد بسري :
حملة إيقاف السدود العشوائية بلشت عام ٢٠١٤ وبينها سد بسري وعام ٢٠١٥ تقدم أهالي جزين بطعن بمجلس شورى الدولة لايقاف سد بسري بعد اقراره من قبل مجلس نيابي غير شرعي وممدد لنفسه واستمر النضال ضمن حملة وطنية لانقاذ مرج بسري وكانت ٩ تشرين الثاني ٢٠١٩ احدى محطاتها يوم دخل آلاف المواطنين عالمرج اللي كان ممنوع دخوله من ناحية جزين و١٧ تشرين الثاني ٢٠١٩ يوم فتحنا الطريق المقفلة من ناحية الشوف واللي بتودي على كنيسة مار موسى الأثرية ودير القديسة صوفيا و٤ ايلول ٢٠٢٠ تراجع البنك الدولي عن تمويل المشروع والنضال مستمر لحين اعلان مرج بسري محمية طبيعية وزراعية وأثرية للاجيال القادمة
٣- بسبب الحقد والجهل والنكد :
الحملة الوطنية لإنقاذ مرج بسري جمعت الأهالي والجمعيات البيئية والبلديات والخبراء العلميين والقانونيين واشتغلت بمهنية وبدافع حب الطبيعة وتاريخ لبنان والتنمية المستدامة وحماية المال العام
الجاهل هو يللي بيدمر اكبر سهل زراعي بجبل لبنان وبيهدد الأمن الغذائي والجاهل هو يللي بيدمر منطقة أثرية غير مكتشفة بعد بيمر فيها الدرب القديمة للحرير واللي محتمل يكون السيد المسيح مشي عليها بطريقه من صيدا عالمدن العشر
٤- يللي وقفوا سد بسري لازم يتحاكموا :
يللي لازم يتحاكم هو يللي خالف القوانين بكل السدود اللي نفذت من سد القيسماني اللي نعمل بحرم نبع شاغور حمانا مروراً بسد جنة وبقعاتة والمسيلحة وبلعا اللي بدأ تنفيذن قبل إعداد دراسات تقييم الأثر البيئي والإجتماعي وموافقة وزارة البيئة علين وكان هالشي سبب فشل هالسدود وارتفاع كلفة تنفيذها وتدمير الطبيعة دون جدوى، وصولاً لسد بسري اللي بلش تنفيذه صيف ٢٠١٩ بعد انتهاء صلاحية موافقة وزارة البيئة على دراسة تقييم الأثر البيئي والاجتماعي عام ٢٠١٦
- لو في عدل بلبنان :
هيدي الجملة المفيدة الوحيدة اللي قلتها بكل الخطاب
لو في عدل بلبنان كنت حضرتك ممنوع من الترشح بسبب مخالفاتك العديدة للقوانين واللي عنا اثباتات عنها اقله بملف السدود العشوائية
٥- على البنك الدولي إعادة ٤٠٠ مليون دولار للدولة انهدروا :
صحيح جزء كبير من هالمبلغ انهدر بسبب سوء التخطيط، على إنشاء محطة الوردانية والنفق من المحطة على بيروت قبل ما يتنفذ السد ونتأكد من جدواه
بينما الجزء اللي اندفع عالاستملاكات هو استثمار رابح للدولة وللشعب اللبناني على اراضي خصبة وغنية بالآثار والمياه ويمكن ترد أضعاف من الأرباح للدولة ويمكن اعادة هالاموال بسهولة للبنك الدولي
٦- وقفوه بكذبة البيئة :
الكذب مش من شيمنا وكل قضية رفعناها دفاعاً عن البيئة والطبيعة تبين انه الحق معنا لاننا منخوض معاركنا مسلحين بالعلم والقانون
وهيك صار بمعركة الدفاع عن مرج بسري
٧- كيف نحنا منشتغل ، كيف هني بيوقفوا :
شرف النا نوقف مشاريعكن الفاشلة واللي بتهدر المال العام وبتدمر طبيعة لبنان
٨- سد بسري أرخص سد بلبنان كلفته ١٢٠ مليون دولار :
من ثواني كان عم يطالب بإعفاء الدولة من ٤٠٠ مليون دولار والسد بعد ما بلش بناؤه
كيف بتكون كلفة السد ١٢٠ مليون ؟
الحقيقة انه كلفة مشروع جر المياه وتكريرها وبناء السد مقدرة ب ٨٧٥ مليون دولار مش ١٢٠ مليون دولار
هيدا بالنظري ونحنا منعرف انه التجارب بينت انه كلفة تنفيذ السدود دوبلت او تربلت مثلاً سد بلعا كانت كلفته مقدرة بحوالي ٢٥ مليون دولار ووصلت اليوم ل٦٠ مليون دولار وبعد ما جمع مي
٩- بيجمع ١٢٠ مليون متر مكعب من المياه :
مش صحيح
بحسب تقارير البنك الدولي سد بسري مقدر يجمع حوالي ٦٠ مليون متر مكعب والباقي بينجروا من بحيرة القرعون بالاضافة لنبع عين الزرقا وينابيع جزين
١٠- سد بسري بيروي جزين وصيدا والجنوب :
اسم المشروع جر مياه الأولي الى بيروت الكبرى
بالعكس رح ياخدوا مياه ينابيع جزين على بيروت وصيدا رح تنحرم من مياه الأولي لري المزروعات اذا حصرت المياه بالسد وخاصة خلال ايام الصيف
احبائي أهالي جزين وصيدا
السيد جبران باسيل عم بيضللكن
من كم اسبوع نشر اشاعة انه مرج بسري اصبح مخيم للنازحين وهلق عم بيوعد بمياه مش موجودة وبمشروع مش ممكن يجمع مي ورح يهدر المال العام دون جدوى
بالاضافة للخطر اللي ممكن ينتج عن تحريك فالق روم والخسارة اللي ممكن تحصل في حال دمار وادي أشمون الأثري
تحية لكل الناشطين المدافعين عن مرج بسري اللي بيستحقوا التكريم مش المقاضاة
وبطالب القضاء اللبناني بمحاسبة السيد باسيل وفريقه بوزارة الطاقة والمياه على مخالفاتن للقانون قبل موعد الإنتخابات النيابية والا بيكون معه حق انه ما في عدل بلبنان
بول شفيق أبي راشد
الاثنين ٢ أيار ٢٠٢٢
