اشار الرئيس المكلف سعد الدين الحريري عن نتائج اجتماعه مع رئيس الجمهورية اللبنانية ميشال عون وقال :”في إجتماعي الأخير مع الرئيس عون اتفقنا على اللقاء اليوم إلا أنه للأسف أرسل لي أمس تشكيلة تتضمن ثلثاً معطلاً لفريقه وطلب مني أن أعبئها. بتضمن الورقة ثلث معطل لفريقه السياسي، بـ 18 وزير او 20 أو 22. وطلب مني فخامته اقترح اسماء للحقائب حسب التوزيعة الطائفية والحزبية يللي هوي محضرها.
بكل شفافية، رح قلكن يللي قلتلو اياه اليوم .
أولا: هيدي غير مقبولة لانو الرئيس المكلف “مش شغلتو يعبي وراق من حدا”، ولا شغلة رئيس الجمهورية يشكل حكومة،
وتانياً لانو دستورنا بيقول بوضوح الرئيس المكلف بيشكل الحكومة وبيوضع الاسماء، وبيتناقش بتشكيلتو مع فخامة الرئيس. على هالاساس، بلغت فخامتو بكل احترام، إني بعتبر رسالتو كأنها ما كانت، ورجعتلو اياها، وبلغتو كمان إني رح احتفظ بنسخة منها للتاريخ!
ثانيا: قلت لفخامة الرئيس ان تشكيلتي بين يديه من ١٠٠ يوم وجاهز هلق متل ما سبق وقلت علنا لاي اقتراحات وتعديلات بالاسماء والحقائب، وحتى اصراره على وزارة الداخلية سهلتلو الحل. لكن مع الاسف جوابه الواضح: الثلث المعطل. هدفي واحد، وضع حد للانهيار ومعاناة اللبنانيين. وطلبت من فخامة الرئيس، يسمع اوجاع اللبنانيين، ويعطي البلد فرصته الوحيدة والاخيرة بحكومة اختصاصيين تقوم بالاصلاحات وتوقف الانهيار، بلا تعطيل ولا اعتبارات حزبية ضيقة. بالانتظار، ولأن فخامة الرئيس قال بخطابه الاخير إني ما قدمتلو إلا خطوط عريضة، رح وزع عليكم التشكيلة الكاملة بالاسماء والحقائب يللي قدمتلو اياها هون ببعبدا بـ 9 كانون الاول 2020، يعني من اكتر من 100 يوم، وبترك الحكم عليها للرأي العام.
