تصدّرت أغنية أمي التي طرحتها النجمة نانسي عجرم في مناسبة عيد الأم، مواقع الانترنت وتخطّت المليوني مشاهدة خلال ٤٨ ساعة فقط. والأغنية عمل متكامل من كلمات الشاعر اللبناني اميل فهد وألحان يحيى الحسن. وقام بعمل التوزيع القدير باسم رزق واخرج الفيديو كليب المخرج سمير سرياني، كما قامت كريستال الياس من شركة lucid بتلوين الفيديو.
وان كانت النجمة نانسي عجرم أم الأغنية فالشاعر اميل فهد هو الاب حتماً. وفي حديث خاص معه، اخبرنا عن الكلمات وتفاصيل كتابتها وكيف تم التواصل مع نانسي عجرم. وقال فهد: “من بين المواضيع الإنسانيّه البِتشدّني كتابتا هيّي: قصايد الإم والبَي المش سَهل العبور لَ عالَمن الغني بالمشاعر البتطال دمع الما انبَكى… ولأنّي ربيت ب بيت من بيوت الضيعه العتيقه مع بَيّ عصامي صارم، وإم قدّيسه أخدت من صدرا قماشتي اللي فصّلتا مع العمر قصايد عطر، وشغف بمعاني الحياة وحُب المرا البشوفا تلات ترباع الدِني.. لَهَيك كان لَ إمّي وبَيّي قَصايد بِلون الوَفا وبنكهة خبز التنّور، وصاج الحَطَب….
وانتي عمر كرمالنا مقتول
وأيا هدايا حقك بتوفي؟؟
وإنتي هديتينا العمر ع طول…
أمّا أغنية ( إمّي ) فَ كَتَبتا بِطَلَب من صديقي الفِي انا وياه كتير من الأعمال الغنائيه المُشتَرَكِه الملحّن يحيى الحَسَن “بِوقت ما بيتجاوز ربع ساعه” وما كنت عارف مين رح يغنّيا.. وبعد وقت مش طويل عرفت مِنّو إنّو هالأغنيه حابّتا النجمه المحبوبه نانسي عجرم .. ورَح تسَجّلا ع عيد الأم .. واكيد فرِحت بالخَبَر.
لا شك النص كَ أغنيه بيحمل قيمه شعريّه، وبنفس الوقت بيظَهّر حقيقة إحساسي، ولَحظِة الكَتبتو انغَرَمت فيه وعشت حالتو…
أوّل تاثّر كان إلي لمّا سَمّعني الكلام مع اللحن وكانت نازله دمعتو..
أمّا مجزرة الإحساس الكبيره كانت لمّا سمعت الأغنيه مسَجّله بصوت نانسي.. ما قدرت هَدّي دموعي قد ما حاسِّتا، وعاطيتا نَفَس الخلود..
بالختام بحب إشكر كل الفريق الساهم بنجاح هالعمل وخاصةً الملحّن يحيى الحسن، والموزّع الموسيقي الصديق باسم رزق.. ومنوعدكن بتعامل جديد مع الرائعه نانسي .. انطرونا.
